امثال وحكم مصرية

 القد قد الفولة والحس حس الغول 

يقال عندما يكون الجسم ضئيل والصوت عالى

اللى افتكرنى ما حقرنى ولو جاب طوبة وزقلنى

يقال عندما يحب الانسان ان يتذكره شخص حتى لو يرميه بطوبة

الحاجة فى السوق تقول نينى نينى لغاية ما ييجى الاهبل ويشترينى

يقال عندما يظل اى شىء مهمل ثم يأتى من يشتريه ويقدره

جبنا الاقرع يونسنا كشف راسه وخوفنا

يقال عندما نستعين بانسان للانصاف والمساندة ثم ينقلب عدو

خد من الزرايب ولا تاخد من القرايب

يقال لمن يريد ان يتزوج قريبته والمصريين اغلبيتهم يكرهون زواج الاقارب

يادى الشيلة يادى الحطة رحت على جمل وجيت على قطة

يقال عندما يبذل جهدما ثم النتيجة غير مرضية ولا تساوى تكون* الجهد المبذول

الخنفسا شافت ولادها على الحيط قالت يا لولى ملضم فى خيط

يقال لمن تتباهى باولادها وتعتبرهم افضل الناس

طول ما هو على الحصيرة لا هيشوف طويلة ولا قصيرة

يقال للشخص الفقير اذا احب ان يتزوج

لو كان القرد بص لحاله ماكان اللعب جه على باله

يقال لمن ياخذه الغرور بالرغم من انه سفيه

اللى متعرفش ترقص تقول الارض عوجه

يقال لمن تفشل فى شىء وتدعى ان الفشل قدرى وليست هى المتسببة فيه

يا مئمنه للرجال يا مئمنه للميه في الغربال

يعني اللي تدي الامان للرجال كانها بتئامن للميه وتحطها في غربال

الغربال هو -المنخول وهوعباره عن سلك بيه فتحات لنخل الدقيق

بيصطاد في الميه العكره

يعني شخص يستغل وجود موقف سئ بين شخصين ويبتدي يدور علي مصلحه خاصه ليه في وسط مشاكلهم

مراية الحب عاميه

يعني ان الواحد لما بيحب مبيشفش عيوب اللي بيحبه عشان كده بيتقي كانه باصص في مرايه شايف الصوره ومش شايف الاصل وعشان كده عاميه

اقلب القدره علي فمها تطلع البنت لامها

طبعا المثل ده موجود في كل الوطن العربي بس بصيغ مختلفه

ويعني ان البنت بتطلع لامها في كل شئ مهما كان حتي ولو قلبت القدره فهي برده بنتها

حبيبك يبلع لك الزلط وعدوك يتمنى لك الغلط

اكيد طبعا اللي يحب حد يسامحه ويغفرله ويعديلوه اي شي لكن العدو حتي لو بتعمل خير يتمنالك غلط عشان يئذيك

قالوا بلدك فين ياجحا قالى اللى مراتى فيها

انا بقي بحب المثل ده قوي وان معناه ان الراجل مكان ما مراتك تكون هو يكون جنبها

يا فرعون مين فرعنك قال ملقتش حد يلمني اضرب المربوط يستحي السايب 

الاتنين عندي معناهم واحد وهو ان الانسان لازم يكون ليه موقف قوي مع اي حد يغلط فيه عشان الحد ده ميطلعش فيه